Psa 67 | MapM | STEP | לַמְנַצֵּ֥חַ בִּנְגִינֹ֗ת מִזְמ֥וֹר שִֽׁיר׃

Psalms 67

1 לַמְנַצֵּחַ בִּנְגִינֹת מִזְמוֹר שִֽׁיר׃ 2 אֱֽלֹהִים יְחׇנֵּנוּ וִיבָרְכֵנוּ יָאֵֽר פָּנָיו אִתָּנוּ סֶֽלָה׃ 3 לָדַעַת בָּאָרֶץ דַּרְכֶּךָ בְּכׇל־גּוֹיִם יְשׁוּעָתֶֽךָ׃ 4 יוֹדוּךָ עַמִּים ׀ ^{▼▼פסק ולא לגרמיה} אֱלֹהִים יוֹדוּךָ עַמִּים כֻּלָּֽם׃ 5 יִשְׂמְחוּ וִירַנְּנוּ לְאֻמִּים כִּֽי־תִשְׁפֹּט עַמִּים מִישֹׁר וּלְאֻמִּים ׀ בָּאָרֶץ תַּנְחֵם סֶֽלָה׃ 6 יוֹדוּךָ עַמִּים ׀ ^{▼▼פסק ולא לגרמיה} אֱלֹהִים יוֹדוּךָ עַמִּים כֻּלָּֽם׃ 7 אֶרֶץ נָתְנָה יְבוּלָהּ יְבָרְכֵנוּ אֱלֹהִים אֱלֹהֵֽינוּ׃ 8 יְבָרְכֵנוּ אֱלֹהִים וְיִֽירְאוּ אוֹתוֹ כׇּל־אַפְסֵי־אָֽרֶץ׃